’t Is márt 1947, 2 jaor nao de bevrijding ván d’n oeërlog. Theike Laorberghs en zien buurmechje
Anneke de Schans zien hevig verlaef op mekaar, óndanks ’t gegaeve dát zeej elkaar naet
meuge zaen, want zeej is namelik ván Árcese komaaf. Theike nimp Anneke mei naor en veilige
plek; de kelder ván ’t Scholtishoes. Vaol passie vertelt hae uvver zien toekómsplanne. Hae is
vasbeslaote um ’t Scholtishoes te koupe, te verbouwe en mit Anneke te trouwe. Anneke huurt
de planne vaol bewóndering aan, már ze is en bietje uvverrompeld. Ze is nag erg jóngk en daes
planne zien wal hiel erg spannend en definitief. Daonaeve wet ze naet wie eur elders d’r uvver
zulle dinke. Ze wet zich genne raod en twiefelt aan ’t plan ván Theike. Ze mót d’r gewoeën nag
en nechske uvver slaope.

Ás Theike daen aovend thoeskump, is zien vader óntiegelik kwaod. Hae haej en geruch
gehuurd dát Theike verkiering zuuj hebbe mit ’t buurmechje. Theike ontkint ’t in ierste
instantie, már bezwiek ónder de druk ván zien vader. D’r ontsteit en heftige ruzie, zoeë heftig
dát Theike besluut um zien spulle te pakke en aaf te reize naor Nederlands Indië, um zich aan
te sloete beej de KNIL. Zónder ok már iets te zegge, verdwient hae en zit Anneke de volgende
daag gans allein in de kelder ván ’t Scholtishoes mit doézend en ein vraoge.
Nao dreej jaor in Semerang beej de KNIL te hebbe gedind, gebeurt d’r iets heftigs in enne
kampong vlakbeej eure legerbasis. Theike vlucht zónder en spaor achter te laote. De KNIL-
soldaote wane ‘m doeëd, ás zeej um nao lang zeuke ni mier kunne vinde.

Via umzwervinge langs de Indonesische eilanden kump Theike oeteindelik in Vietnam terech.
Daor dint hae nag ens 4 jaor in ’t Franse en 2 jaor in ‘t Amerikaanse leger, vurdát hae wir
truukkiert nár Velde.

’t Is in ’t veurjaor ván 1957 ás Theike wir vaot zet in zien dörpke aan de Maas, nao de ruzie mit
zien vader. Theike is vasbeslaote um zien planne ván destieds te realisaere. Vuuel is ‘t zelfde
geblaeve; ’t Scholtishoes steit laeg, de Veldenaere zien ’t naet ins mit mekaar, behalve dát de
Árcese ván alles schuld zien. De Bekker en de Kruidenaer vlaege mekaar iddere daag in de
haor, de vrouwe perbaere de zake te susse en de Liekepikker waart daor Velde. Tielke gluift
nag stieëds dát ze Theike zal vinde. Pieter Koekoek, de wandele krant ván Velde spelt nieje
verhaole op idders mouw en de drie K’s kwatse wát aaf in ’t kefee ‘Beej Bets’ aan de Mert.

D’r is ok enne houp veranderd; zoeë zien d’r nieje minse in ’t dörp kómme woeëne, duit enne
plaatsvervangende pestoeër de mis en baant de vrouwegroep EVA enne waeg wiedweg ván
ADAM. En in pláts ván dát ’t gemintehoes in ’t Scholtishoés zuuj waere óndergebrach, strieje
Veldese middestanders, Árcese geminteraodsleje en Venlose óndernaemers um ’t
Scholtishoes. De Veldese ambtenaere kieke op gepaste aafstand toe en gaeve de regie oet
hand. Már de groeëtste verandering is toch wal dát Anneke verlaef is gewaore op immes
anders, oetgeraekend Hans ván Jér ván Kaak Mie, wao Theike vrujer duk ruzie mei haet gehad.

En letterlik en figuurlik pienlikke situatie steit Theike te wachte en hae zal mótte vechte um

de liefde ván zien laeve truuk te kriege en ziene druim waor te make...

 
 
 
E-mailen
Instagram